हेटौंडामा फुटबल खेलको विकासका लागि वार्षिक एक करोड विनियोजन गर्ने गठबन्धनको घोषणा
सत्तारुढ गठबन्धनले हेटौंडा उपमहानगरपालिकाभित्र फुटबल खेलको विकास गर्न वार्षिक एक करोड रुपैयाँ विनियोजन गर्ने घोषणा गरेको छ । सत्तारुढ गठबन्धनको तर्फबाट हेटौंडाको मेयरका उम्मेदवार मीना लामा र उपमेयरका उम्मेदवार राजेश बानियाँले फुटबल खेलको विकास र खेलाडीहरूको प्रोत्साहनको लागि सो बजेट खर्च गरिने बताएका हुन् ।
बुधबार हेटौंडा–१० स्थित वन विज्ञान अध्ययन संस्थानको खेल मैदानमै पुगेर खेलाडीहरूसँग अन्तरक्रिया गर्दै खेलाडीको माग अनुसारको बजेट आफूहरु निर्वाचित भएपछि विनियोजन गर्ने प्रतिवद्धता जनाएका हुन् ।
हेटौंडा फुटबल खेल र खेलाडी उत्पादनको हिसावले देशमै चर्चित भएका कारण आवश्यकताअनुसार बजेट विनियोजन गर्ने प्रतिवद्धता उम्मेदवारहरूले जनाएका हुन् ।
उनीहरुले खेल तालिका नै बनाएर प्रतियोगिता गर्नुपर्ने माग गरेका थिए । उम्मेदवारद्वयले समग्र खेल क्षेत्रको विकासमा पनि आफूहरुले काम गर्ने योजना ल्याएको र त्यसलाई कुशलतापूर्वक पूरा गर्न खेलाडी, प्रशिक्षक र खेल क्षेत्रका व्यक्तित्वहरुको सहयोग आवश्यक रहेको औंल्याएका थिए ।